12 dekabr Azərbaycan xalqının yaddaşında dərin hörmət və ehtiramla anılan bir tarixdir. Bu gün müstəqil dövlətimizin qurucusu, milli dövlətçilik ideyalarının banisi, xalqımızın ulu lideri Heydər Əliyevin anım günüdür. Azərbaycan xalqı hər il olduğu kimi bu il də Ulu Öndərin misilsiz xidmətlərini böyük ehtiramla xatırlayır, onun zəngin həyat yolunu bir daha dəyərləndirir. Bu gün keçirilən tədbirlər, müxtəlif bölgələrdə təşkil olunan anım mərasimləri, Ulu Öndərin xatirəsinə ehtiram ifadə edən çıxışlar onun xalqın yaddaşında necə böyük sevgi ilə yaşadığını bir daha nümayiş etdirir.
Heydər Əliyevin adı Azərbaycan tarixində əvəzolunmaz liderlik, dövlətçilik ənənələri və böyük xilaskarlıq missiyası ilə həkk olunub. XX əsrin çətin və mürəkkəb siyasi prosesləri fonunda onun fəaliyyəti dövlətçilik təfəkkürünün mükəmməl nümunəsi, xalqına bağlılığının isə ən ali göstəricisi olmuşdur. Ulu Öndər siyasi müdrikliyi, iradəsi və qətiyyəti ilə həm sovet dövründə, həm də müstəqilliyin bərpasından sonra Azərbaycanı itirilmiş imkanlardan sabitliyə, xaosdan inkişaf yoluna çıxarmışdır. Onun rəhbərliyi altında atılan hər bir addım, qəbul edilən hər bir qərar Azərbaycanı gələcəyin güclü, modern və müasir dövlətinə çevirmək məqsədi daşıyırdı.
1990-cı illərin ən ağır dönəmində Heydər Əliyevin xalqın tələbi ilə yenidən hakimiyyətə qayıdışı Azərbaycanın siyasi, iqtisadi və sosial həyatında dönüş nöqtəsi yaratdı. Onun uzaqgörən siyasəti nəticəsində ölkəmizdə sabitlik bərqərar oldu, hərbi quruculuq gücləndirildi, iqtisadi islahatlara start verildi, neft strategiyası həyata keçirildi. “Əsrin müqaviləsi” kimi tarixi sənədlər Azərbaycanın beynəlxalq aləmdə mövqeyini möhkəmləndirdi, ölkəmizi regionun strateji mərkəzlərindən birinə çevirdi. Bu dövr həm də yeni dövlət quruculuğunun, milli inkişaf konsepsiyasının formalaşdığı, Azərbaycanın gələcək yüksəlişinin təməl prinsiplərinin müəyyənləşdiyi mərhələ oldu.
Heydər Əliyev yalnız siyasətçi deyil, həm də dərin düşüncəli dövlət xadimi kimi Azərbaycançılıq ideyasını milli birlik fəlsəfəsinə çevirdi. Onun həyata keçirdiyi sosial proqramlar, təhsil, mədəniyyət, ordu quruculuğu və gənclər siyasəti bu gün də öz bəhrəsini verir. Ulu Öndərin yaratdığı möhkəm təməl üzərində Prezident İlham Əliyev tərəfindən davam etdirilən siyasət Azərbaycanı daha güclü, daha qüdrətli və nüfuzlu bir dövlətə çevirib.
Bugünkü iqtisadi yüksəliş, beynəlxalq nüfuz, güclü ordu və genişmiqyaslı regional layihələr Heydər Əliyevin uzaqgörən ideyalarının davamının ən bariz göstəricisidir.
12 dekabr – Heydər Əliyevin anım günü təkcə bir xatırlama günü deyil, həm də onun ideyalarına sədaqətin ifadəsidir. Bu tarix xalqımızın böyük liderinə olan sevgisinin, minnətdarlığının və ehtiramının təcəssümüdür. Heydər Əliyev hər zaman Azərbaycan xalqının qəlbində yaşayacaq, qurduğu müstəqil dövlət isə onun ən böyük irsi kimi daim inkişaf edəcək. Onun adı Azərbaycan dövlətçiliyinin gücünün, xalqın birliyinin və müstəqilliyin əbədiliyinin rəmzi olaraq yaşayacaq.
